د پنجشنبې په ورځ د حزب اسلامي مشر ګلبدین حکمتیار وویل چې ګوند یی د سولې لپاره خپل پلان په افغانستان کې له نفوذ لرونکو سیاسي ډلو سره شریک کړی دی.
له افغانستان څخه د بهرنیو ځواکونو وتل او د لنډمهاله حکومت رامینځته کول یی د پلان برخه ده.
حکمتیار وویل چې د ملي پخلاینې عالي شورا یو شمیر غړي، سیاسي خوځښتونه او سیاسي ګوندونه هم په ترکیه کې د افغانستان په اړه د ملګرو ملتونو تر مشرۍ لاندې راتلونکي کنفرانس کې د خبرو لپاره پر خپل پلانونو کار کوي.
حکمتیار وړاندیز وکړ چې د سولې یو واحد پلان باید د مختلفو ډلو لخوا وړاندیز شوي مختلف پلانونو څخه رامینځته شي.
حکمتیار وویل: “د ملي پخلاینې عالي شورا غړي په بیلابیلو لارو فکر کوي ځکه چې د سولې عالې شورا هیڅ پلان نه دی په ګوته کړی. د دې معنی دا ده چې حکومت هم د دې وړتیا نه لري چې د سولې جامع او منلو وړ پلان جوړ کړي.”
حکمتیار په متحده ایالاتو هم غږ وکړ چې د متحده ایالاتو او طالبانو ترمینځ د سولې تړون پراساس د ځواکونو ایستلو لپاره خپلې ژمنې ته درناوی وکړي.
حکمتیار وویل چې د ترکیه په کنفرانس کې د طالبانو د مشر ملا هیبت الله اخندزاده د شتون امکان خورا سخت ښکاري، خو هغه وویل چې ولسمشر محمد اشرف غني باید په کنفرانس کې د پلاوي مشري وکړي.
حکمتیار وویل: “که د اسلامي امارت لومړی مرستیال (د طالبانو سیاسي نظام لپاره کارول شوی اصطلاح) یا د طالبانو سیاسي مرستیال د ترکیه په کنفرانس کې برخه واخلي، نو دا به کافي وي.”
د اسلامی حزب لاریون
حکمتیار وویل چې د هغه ملاتړي به د جمعې په ورځ په کابل کې لاریونونه کوي او د دوی غوښتنه به د حکومت د غړو استعفا وي.
د ولسمشر غني سلاکار، عبدالرشید ایوبي وویل: “اوسني وضعیت ته په کتو، پر حکومت د فشار زیاتیدل ښه کار ندی. ښاغلي حکمتیار د سیاسي مشر په توګه باید د سولې او پخلاینې لپاره کار وکړي.”
